Unha cruz vinculada ao paso deste antigo camiño.
O Cruceiro das Lamarellas marca o lugar dende o que a verea máis vella do lugar parte cara o único destiño nesa dirección: o Muro da Cidade de Medeiros. Se seguimos ese camiño comprobaremos cada pouco a profundidade e rotundidade das rodeiras dos carros que por alí pasaron durante séculos…
Contaba o veciño Santiago Martínez, meu avó, que un home que viña da feira de Verín, xa de noite, polo vello camiño de Requeixo, comezou a ser perseguido polos lobos e que, fuxindo, deuse de narices cun carballo que non vira. Aproveitando o carballo, subiuse a el e véndose rodeado polos lobos fixo un voto solemne ante Deus de que se zafaba do apuro, alí mesmo erguería un cruceiro que lembrase para sempre a súa salvación… O caso é que o cruceiro alí segue.
Ten base cadrada de tres chanzos moldurados e unha peana cúbica con cartela rebaixada e texto ilexible, da que arranca un fuste cilíndrico e moi alto que remata nun capitel xónico e unha cruz de sección octogonal.
This entry was posted in Atlas