A memoria colectiva garda case como un segredo que na ladeira occidental do castro, ao lado contrario da capela de San Brais, existiu outro templo cristián, a poucos metros da confluencia do regato de Soutobeía co regato de Soutonovo. Aínda sabemos menos deste lugar que de relixioso pasou a ser máxico por arte do paso do tempo. É a terceira pata do mundo espiritual que comeza no Burato, pasa por San Brais e remata en San Lázaro.
Pero moito máis interesante é que, sendo esta ladeira ben empinada, había unhas escaleiras que unían a entrada do castro (lado sur) coa capela. Se as de San Brais podían ser confundidas cos socalcos do viño nesa ladeira, neste caso non é posible posto que ésta non está traballada. E non sabemos máis nada…
